«Sarı şerit» areketiniñ faalleri Rusiye işğal etken Aqyar ve Aqmescitte yerleştirilgen Ukrayina tirenüvi timsalleriniñ yañı fotoresimlerini derc etti.
«Graffiti, stiker, şeritler – «Sarı şerit» areketiniñ faalleri er kün ve muntazam sürette bütün dünyağa Qırım Ukrayina olğanını hatırlata. İnana, seve, bekleymiz», – dep yazdı faaller.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
